8 декабралда МахIачхъалаялда ДРялъул ХIукуматалъул председателасул заместитель Мурат ШихсагIидовас тIобитIана бруцеллез тIибитIун букIиналда бан данделъи.

Гьенир гIахьаллъана министрзаби, ведомствабазул нухмалъулел, шагьаразул ва районазул бутIрул. М.ШихсагIидовас бихьизабуна республикаялда бруцеллез унти тIибитIиялъул суал кIвар кьечIого тезе бегьиялдаса ун бугилан. 11 моцIалда унтун буго 1620 чIегIерхIайван ва 826 бетIер гIи-цIцIаназул. Гьеб унти гIадамаздеги бахиналъул хIинкъи букIиналъ тIалаб гьабулеб буго кIванагIан хехго тадбирал тIоритIи. Республикаялъул рахунел унтабазул централъул баяназда рекъон, 11 моцIалда жанив жанив бруцеллезалъ унтун вуго 248 чи.

ДРялъул ветеринариялъул комитеталъул председатель М.ГъазимухIамадовас бицана:

«Республикаялда щибаб соналъ бруцеллезалъ унтун бугищали халгьабула 600 азарго чIегIерхIайваналъул, 300 азарго бетIер гIи-цIцIаназул, 6000 чу-хьваниялъул ва 500 гьвеялъул. Аслияб масъалалъун хутIун буго унтараб гIи-боцIи хъвехъулел бакIазда санитариял шартIал гIуцIун гьечIолъи. ГIемерисеб гIи-боцIи хъолеб буго гIадамазул азбаразда, ветеринариялгун санитариял тIалабазул милатги гьабичIого. Гьелъ квербакъи гьабула унтаби тIиритIиялъе. Жеги цIикIкIараб захIмалъи буго нилъер республикаялде цогидал регионаздаса бачIунеб боцIул халгьабулеб гьечIолъиялъулъ».

ДРялъул Роспотребнадзоралъул республикаялда бугеб управлениялъул нухмалъулей Э. ГIумариевалъ рикIкIунеб буго нилъерго къуваталдалъун гьеб унтуда данде къеркьезе бажаризе гьечIин. Гьелъ абуна, РФялъул президентасул СКФОялда вугев вакил А.Хлопонинида республикаялъул хIукуматалъул рахъалдасан лъазабизе ккелин бруцеллезалъул суал гьоркьоб лъураб данделъи ахIун лъикIилан.